ڪراچي: (ويب ڊيسڪ) هڪ نئين مطالعي موجب پاڪستاني عورتن ۾ دل جي نالين جي بيماري سبب موت جي شرح ڏکڻ ايشيا جي 5 ملڪن ۾ سڀ کان وڌيڪ آهي. ماهرن موجب هاءِ بلڊ پريشر، ذيابيطس (شگر)، ٿولهه، جسماني سرگرمي جي کوٽ ۽ سبزين ۽ فائبر جي گهٽ استعمال سبب عورتن ۾ دل جي بيمارين جو خطرو وڌي رهيو آهي.
ورلڊ هارٽ ڊي جي موقعي تي ڪراچي پريس ڪلب ۾ ماهرن ’هر هارٽ ميٽرز‘ مهم شروع ڪندي عورتن ۾ دل جي بيمارين جي جلد سڃاڻپ، اسڪريننگ ۽ بروقت علاج تي زور ڏنو. ماهرن موجب عورتن ۾ دل جي بيماري کي اڪثر ان غلط فهمي سبب نظرانداز ڪيو ويندو آهي ته اها بنيادي طور مردن جي بيماري آهي.
2026ع ۾ JACC: Asia ۾ شايع ٿيل مطالعي ۾ پاڪستان، ڀارت، بنگلاديش، نيپال ۽ ڀوٽان جي صورتحال جو جائزو ورتو ويو. مطالعي موجب 2021ع ۾ پاڪستاني عورتن ۾ دل جي شريانين جي بيماري سبب عمر جي حساب سان موت جي شرح انهن 5 ملڪن مان سڀ کان وڌيڪ هئي.
ماهرن چيو ته حمل دوران هاءِ بلڊ پريشر کي ٻار جي پيدائش کان پوءِ به نظرانداز نه ڪرڻ گهرجي، جڏهن ته حمل کان پوءِ دل جي ڪمزوري واري بيماري به سنگين صورتحال پيدا ڪري سگهي ٿي. جي پي ايم سي جي ماهر موجب سندس ڪلينڪ ۾ اسڪريننگ دوران اٽڪل 4 سيڪڙو ڳورهارين عورتن ۾ دل جي بيماري جي سڃاڻپ ٿي.
ماهرن موجب جي پي ايم سي جي ذيابيطس ڪلينڪ ۾ ايندڙ 90 سيڪڙو کان وڌيڪ عورتن ۾ گهٽ ۾ گهٽ هڪ دل جي بيماري جو خطرو موجود هو. ڊاڪٽرن زور ڏنو ته ذيابيطس، هاءِ بلڊ پريشر يا ٿولهه ۾ مبتلا عورتن جي باقاعده اسڪريننگ، مناسب علاج ۽ دوائن جو تسلسل دل جي سنگين پيچيدگين کان بچاءَ لاءِ ضروري آهي.
