غزا (م ڊ) غزا پٽي تي اسرائيلي فوج جي بمباري جاري آهي، جنهن جي نتيجي ۾ تازن حملن ۾ گهٽ ۾ گهٽ 18 فلسطيني شهيد ۽ ڪيترائي زخمي ٿي پيا آهن.
طبي ذريعن موجب حملن دوران رهائشي علائقا، بي گهر ماڻهن جون پناهه گاهون ۽ امدادي سامان ورهائڻ وارن هنڌن ڀرسان به بمباري ڪئي وئي، جنهن سبب شهري جاني نقصان ۾ وڌيڪ اضافو ٿيو آهي.
فلسطيني صحت کاتي موجب آڪٽوبر 2023ع کان جاري جنگ ۾ هيل تائين هزارين فلسطيني شهيد ٿي چڪا آهن، جڏهن ته لکين ماڻهو بي گهر ٿي ويا آهن.
گڏيل قومن ۽ امدادي ادارن خبردار ڪيو آهي ته خوراڪ، صاف پاڻي ۽ دوائن جي سخت کوٽ سبب غزا ۾ انساني بحران وڌيڪ سنگين صورت اختيار ڪري رهيو آهي.
ٻئي پاسي اسرائيلي فوج جو چوڻ آهي ته ڪارروايون حماس جي ٺڪاڻن ۽ فوجي ڍانچي کي نشانو بڻائڻ لاءِ ڪيون پيون وڃن. اسرائيلي اختيارين دعويٰ ڪئي آهي ته شهري جاني نقصان کان بچڻ جي ڪوشش ڪئي وڃي ٿي، پر حماس شهري علائقن کي ڍال طور استعمال ڪري ٿي، جنهن سبب صورتحال پيچيده بڻجي وڃي ٿي.
هوڏانهن جنگبندي ۽ يرغمالين جي آزادي لاءِ عالمي ثالثي جون ڪوششون جاري آهن، پر هيل تائين ڪنهن نئين معاهدي جو اعلان سامهون نه آيو آهي. گڏيل قومن، يورپي يونين ۽ ڪيترن عالمي اڳواڻن فوري جنگبندي، بنا رنڊڪ انساني امداد جي فراهمي ۽ ڌرين کي تحمل جو مظاهرو ڪرڻ جي اپيل ڪئي آهي.
