نوابشاهه: (اي ڪي ڏاهري) بالو جا قبا ٿاڻي جي حد ۾ تيز رفتار ڊمپر جي ٽڪر ۾ لوڊر رڪشا سوار پيءُ ۽ پٽ فوت ٿي ويا.
ڪنگري جا رهواسي انور خاصخيلي ۽ سندس پٽ تنوير خاصخيلي رڪشا ۾ کجيون کڻي وڃي رهيا هئا ته پٺيان ايندڙ ڊمپر کين ڪچلي ڇڏيو.
حادثي کانپوءِ خاصخيلي برادري جا سوين ماڻهو اسپتال پهچي ويا ۽ پوليس جي مبينا لاپرواهي خلاف احتجاج ڪيو.
وارثن مطالبو ڪيو ته ڊمپر مالڪ ۽ ڊرائيور خلاف ايف آءِ آر داخل ڪئي وڃي، ٻي صورت ۾ لاش نه کڻڻ جو اعلان ڪيو.
علائقي واسين موجب تيز رفتار گاڏين خلاف ڪارروائي نه ٿيڻ سبب اهڙا حادثا وڌي رهيا آهن.
