اسلام آباد ( ويب ڊيسڪ ) وزيراعظم جي سياسي معاملن بابت صلاحڪار سينيٽر رانا ثناءُالله چيو آهي ته سپريم ڪورٽ ۾ توهين عدالت جي درخواست جو جواب اطلاعات يا قانون وارو وزير نه، پر گهرو وزارت ڏيندي.
جيو نيوز جي پروگرام ”ڪيپيٽل ٽاڪ“ ۾ ڳالهائيندي رانا ثناءُالله چيو ته توهين عدالت جو معاملو ان ڪري سامهون آيو آهي، ڇاڪاڻ ته باني پي ٽي آءِ جو طبي معائنو مقرر ڪيل اسپتال بدران ٻئي اسپتال ۾ ڪرايو ويو.
سندس چوڻ هو ته اسپتال امن امان جي صورتحال سبب تبديل ڪيو ويو ۽ امن امان جي ذميواري گهرو وزارت جي آهي، تنهن ڪري گهرو وزارت سپريم ڪورٽ ۾ پيش ٿي ان بابت ثبوت پيش ڪندي.
رانا ثناءُالله چيو ته عدالت واضح طور تي هڪ عمل کان روڪيو هو، پر پي ٽي آءِ طرفان اهو ئي عمل ٻيهر ڪيو ويو.
هن پي ٽي آءِ بابت چيو ته ڳالهين ۽ ٻين سياسي جماعتن سان گڏ ويهڻ ان جي سياسي مزاج ۾ شامل ناهي. سندس چوڻ هو ته تحريڪ انصاف باني پي ٽي آءِ کان شروع ٿي ۽ انهن تي ئي ختم ٿئي ٿي.
پيٽروليم شين جي قيمتن خلاف جماعت اسلامي جي احتجاج بابت رانا ثناءُالله چيو ته جماعت اسلامي کي احتجاج ختم ڪرڻ بابت سوچڻ گهرجي، ڇاڪاڻ ته سندس بقول احتجاج ۾ عوام جي شموليت نظر نه آئي.
هن دعويٰ ڪئي ته عوام جماعت اسلامي جي احتجاج کي رد ڪري ڇڏيو آهي ۽ چيو ته جيڪڏهن احتجاج ۾ ماڻهو شامل ئي نه ٿين ته ان کي عوامي احتجاج ڪيئن چئي سگهجي ٿو.
رانا ثناءُالله وڌيڪ چيو ته حڪومت کي عوام جي مسئلن جو ادراڪ آهي ۽ پاڪستان جون سفارتي ڪوششون ڪامياب ٿيون ته مهانگائي ۽ ٻين معاشي مشڪلاتن ۾ گهٽتائي جا امڪان پيدا ٿيندا.
