لياري ايڪسپريس وي آبادڪاري منصوبي ۾ 16 ارب رپين جي پلاٽ اسڪينڊل جو انڪشاف

ڪراچي (ويب ڊيسڪ) قومي احتساب بيورو (نيب) لياري ايڪسپريس وي ري سيٽلمينٽ (آبادڪاري) منصوبي جي جاچ دوران وڏين مالي بي ضابطگين جو انڪشاف ڪيو آهي.
دستاويزن موجب منصوبي ۾ 16 ارب رپين کان وڌيڪ ماليت جي پلاٽ اسڪينڊل سامهون آيو آهي.
جاچ دستاويزن موجب پروجيڪٽ ڊائريڪٽر منصوبي ۾ شامل 9 هزار غير قانوني پلاٽن کي رد ڪرڻ جي سفارش ڪئي آهي.
رپورٽ ۾ ڄاڻايو ويو آهي ته منظور ٿيل لي آئوٽ کان ٻاهر مختلف هائوسنگ اسڪيمن ۾ هزارين اضافي پلاٽ ٺاهيا ويا.
دستاويزن موجب گرين بيلٽس، سروس روڊن ۽ کليل جڳهن تي قبضا ڪري رهائشي ۽ ڪمرشل پلاٽ ٺاهيا ويا، جنهن سبب سرڪاري ضابطن جي ڀڃڪڙي ٿي.
پروجيڪٽ ڊائريڪٽر غير قانوني ۽ اضافي منظور ٿيل پلاٽن کي ختم ڪرڻ جي سفارش پڻ ڪئي آهي.
نيب دستاويزن مطابق انهن بي ضابطگين سبب سرڪاري خزاني کي گهٽ ۾ گهٽ 16 ارب رپين جو نقصان پهتو آهي.
رپورٽ ۾ اهو به ڄاڻايو ويو آهي ته منظور ٿيل منصوبي کان ٻاهر هزارين ڪمرشل پلاٽ پڻ ٺاهيا ويا هئا.
ذريعن موجب وزيراعظم جي آڊٽ ٽيم جي رپورٽ ۾ به انهن بي ضابطگين جي نشاندهي ڪئي وئي هئي، جڏهن ته تڪراري پلاٽن جي فهرست وڌيڪ ڪارروائي لاءِ لاڳاپيل اختيارين ڏانهن موڪلي وئي آهي.