اسلام آباد ( ويب ڊيسڪ ) وزيراعظم شهباز شريف ملڪ ۾ بي گهر ماڻهن کي ڇت فراهم ڪرڻ لاءِ ”پنهنجو گهر اسڪيم“ جو باقاعده افتتاح ڪري ڇڏيو آهي.
اسلام آباد ۾ ڪوٺايل تقريب کي خطاب ڪندي وزيراعظم چيو ته عام ماڻهوءَ کي گهر فراهم ڪرڻ هڪ مقدس فريضو ۽ اسان جي حڪومت جي اولين ترجيح آهي، جنهن جي هو هر مهيني پاڻ نگراني ڪندو.
اسڪيم جون خاصيتون ۽ هدف: هن اسڪيم تحت شهرين کي 10 مرلي تائين جي زمين تي گهر اڏڻ لاءِ آسان شرطن تي هڪ ڪروڙ روپين تائين جو قرض دستياب هوندو.
وزيراعظم ٻڌايو ته اسڪيم جو شروعاتي هدف 50 هزار گهرن جي تعمير آهي، جنهن کي ايندڙ 4 سالن ۾ 5 لک گهرن تائين پهچايو ويندو. هن اسڪيم جو دائرو چئني صوبن، آزاد ڪشمير ۽ گلگت بلتستان تائين پکڙيل هوندو.
هن ٻڌايو ته اسڪيم لاءِ مجموعي طور تي 3.2 کرب روپين جو حجم رکيو ويو آهي، جنهن مان 321 ارب روپيا فنانسنگ لاءِ مخصوص ڪيا ويا آهن. وزيراعظم بئنڪن کي سخت وارننگ ڏيندي چيو ته جيڪي بئنڪون هن اسڪيم ۾ سهڪار نه ڪنديون، اهي خير جي اميد نه رکن. هن بئنڪن کي قانون موجب بنا دير قرض جاري ڪرڻ جي هدايت ڪندي چيو ته غفلت ڪندڙن خلاف ڪارروائي ڪئي ويندي.
وزيراعظم جو پيغام: شهباز شريف گهر لاءِ قرض حاصل ڪندڙن کي مبارڪباد ڏيندي چيو ته ملڪ ۾ ماڻهن جي وڏي انگ وٽ پنهنجو گهر ناهي، ان ڪري هن اسڪيم ذريعي عوام کي پنهنجي ڇت ڏياري سندن خوابن کي تعبير ڏينداسين.
