اسلام آباد ( ويب ڊيسڪ ) سينيٽ جي قانون ۽ انصاف بابت اسٽينڊنگ ڪميٽي غيرت جي نالي تي قتل جي روڪٿام وارو بل وڌيڪ غور لاءِ ملتوي ڪري ڇڏيو. وفاقي وزير قانون اعظم نذير تارڙ چيو ته موجوده قانونن ۾ اڳ ئي ڪيترائي حفاظتي قدم موجود آهن، تنهن ڪري قانونسازي ۾ ورجاءَ کان پاسو ڪيو وڃي.
سينيٽر فاروق ايڇ نائڪ جي صدارت هيٺ ٿيل اجلاس ۾ بل جو جائزو ورتو ويو، جڏهن ته بل جي محرڪ سينيٽر ثمينه ممتاز زهري وڊيو لنڪ ذريعي شرڪت ڪئي.
سينيٽر ثمينه ممتاز زهري چيو ته غيرت جي نالي تي قتل جا واقعا هر سال سوين انساني جانيون ڳڙڪائي رهيا آهن، تنهن ڪري قانوني خاميون ختم ڪرڻ ۽ ذميوارن جو احتساب ضروري آهي.
اجلاس ۾ جرڳن ۽ روايتي رسمن ذريعي غيرت جي نالي تي قتل لاءِ ڀڙڪائيندڙن خلاف ڪارروائي، سخت سزائن ۽ فوجداري ذميواري وڌائڻ بابت تجويزون پڻ بحث هيٺ آيون.
وفاقي وزير قانون اعظم نذير تارڙ چيو ته اصل مسئلو جاچ، استغاثه ۽ موجوده قانونن تي عملدرآمد ۾ خاميون آهن. ڪميٽي ميمبرن پڻ واضح ڪيو ته ڪا به رسم يا روايت انساني جان وٺڻ جو جواز نٿي بڻجي سگهي.
ڪميٽي چيئرمين فاروق ايڇ نائڪ لا ڊويزن کي موجوده قانونن ۽ تجويز ڪيل ترميمن بابت جامع قانوني بريفنگ ڏيڻ جي هدايت ڪئي.
اجلاس ۾ فيملي ڪورٽس ترميمي بل 2026، جووينائل جسٽس سسٽم ترميمي بل 2026، مسلم فيملي لاز ترميمي بل 2026 ۽ وفاقي پراسيڪيوشن سروس ترميمي بل 2026 پڻ ملتوي ڪيا ويا.
