اسلام آباد ( ويب ڊيسڪ ) پاڪستان پيپلز پارٽي جي چيئرمين بلاول ڀٽو زرداري چيو آهي ته وفاقي حڪومت جي الٽي ڳڻپ شروع ٿي چڪي آهي ۽ عوام جلد تبديلي ڏسندو.
سماجي رابطن واري ويب سائيٽ ايڪس (X) تي جاري ڪيل وڊيو پيغام ۾ بلاول ڀٽو آزاد ڪشمير جي علائقي باغ ۾ جلسي جو اعلان ڪندي چيو ته هو جلد پونڇ اچي رهيو آهي، جتي عوام وڏي انگ ۾ شرڪت لاءِ تياري ڪري.
بلاول ڀٽو دعويٰ ڪئي ته آزاد ڪشمير جون چونڊون شفاف نه هيون، پر ڌانڌلي، گولين ۽ تشدد سان متاثر ٿيل چونڊون هيون. هن چيو ته ان جي باوجود عوام پاڪستان پيپلز پارٽي تي اعتماد ڪندي پارٽي کي نو چونڊيل سيٽن تي ڪامياب ڪرايو.
هن وڌيڪ چيو ته ميرپور ۽ مظفرآباد جون جيڪي سيٽون، سندس دعويٰ موجب، پارٽي کان کسيون ويون آهن، اهي واپس حاصل ڪيون وينديون. هن ڪارڪنن کي اپيل ڪئي ته 4 آگسٽ تي مظفرآباد مان بازل نقوي ۽ جاويد ايوب کي ڪامياب بڻائي مسلم ليگ (ن) جي سازشن کي ناڪام بڻايو.
بلاول ڀٽو چيو ته هو 10 آگسٽ تي باغ ۾ جلسو ڪندو ۽ پاڪستان پيپلز پارٽي نه ڪڏهن همت هارائي آهي، نه پوئتي هٽي آهي ۽ نه ئي ميدان ڇڏيو آهي.
