راولپنڊي ( ويب ڊيسڪ ) فيلڊ مارشل سيد عاصم منير چيو آهي ته دهشتگردي جي مڪمل خاتمي تائين فتنہ الخوارج ۽ فتنہ الہندوستان خلاف ڪارروايون جاري رهنديون.
پاڪ فوج جي شعبي تعلقات عامه (آءِ ايس پي آر) موجب، فيلڊ مارشل عاصم منير جنرل هيڊڪوارٽرز (جي ايڇ ڪيو) راولپنڊي ۾ 20هين نيشنل ورڪشاپ بلوچستان جي شرڪت ڪندڙن کي خطاب ڪيو.
هن چيو ته سيڪيورٽي فورسز ۽ قانون لاڳو ڪندڙ ادارن جون مسلسل ڪوششون، عوام جي مضبوط حمايت سان گڏ، بلوچستان ۾ پائيدار امن قائم ڪرڻ ۾ مددگار ثابت ٿينديون.
فيلڊ مارشل عاصم منير چيو ته دهشتگردن ۽ انهن جي سهولتڪارن خلاف ڪارروايون مڪمل خاتمي تائين جاري رهنديون، جڏهن ته ملڪ ۾ جتي به دهشتگردن جو انفرااسٽرڪچر قومي سلامتي لاءِ خطرو بڻجندو، ان کي ختم ڪيو ويندو.
هن چيو ته ٻاهرين سرپرستي هيٺ ڪم ڪندڙ عنصر بلوچستان ۾ بدامني ۽ عدم استحڪام پيدا ڪرڻ جون ڪوششون ڪري رهيا آهن، پر پاڪ فوج عوام جي اتحاد ۽ سهڪار سان اهڙن ارادن کي ناڪام بڻائيندي.
فيلڊ مارشل عاصم منير بلوچستان کي پاڪستان جو فخر قرار ڏيندي چيو ته صوبو قدرتي وسيلن سان مالا مال آهي ۽ هتان جا محب وطن، باصلاحيت ۽ بهادر ماڻهو بلوچستان جي اصل طاقت آهن.
هن وڌيڪ چيو ته وفاقي ۽ صوبائي حڪومتون بلوچستان جي سماجي ۽ معاشي ترقي لاءِ جامع منصوبن تي ڪم ڪري رهيون آهن، جن جو مقصد صوبي جي ترقي ۽ عوام جي بهتري آهي.
آءِ ايس پي آر موجب تقريب جي پڄاڻي تي شرڪت ڪندڙن سان سوال جواب جي نشست پڻ ٿي، جنهن دوران پاڪستان جي امن، ترقي، استحڪام ۽ خودمختياري لاءِ عزم جو اظهار ڪيو ويو.
