سکر (رپورٽر) پيٽروليم شين جي وڌندڙ قيمتن خلاف سکر شهري اتحاد پاران گهنٽا گهر چوڪ تي احتجاجي مظاهرو ڪيو ويو. مظاهرين حڪومت خلاف سخت نعريبازي ڪندي پيٽرول جي اگهن ۾ واڌ واپس وٺڻ ۽ عوام کي فوري رليف ڏيڻ جو مطالبو ڪيو.
احتجاج دوران سکر شهري اتحاد جي اڳواڻن مولانا عبيدالله ڀٽو، عبدالحق مهر ۽ ٻين ڪارڪنن وزيراعظم شهباز شريف جي پتلي کي باهه ڏئي احتجاج رڪارڊ ڪرايو. اڳواڻن چيو ته پيٽرول مهانگو ٿيڻ سبب ٽرانسپورٽ، کاڌي پيتي ۽ روزمرهه جي شين جا اگهه پڻ وڌي رهيا آهن، جنهن سان مزدور، پورهيت، واپاري، شاگرد ۽ وچولو طبقو سخت متاثر ٿي رهيو آهي.
مظاهرين مطالبو ڪيو ته پيٽروليم شين جي قيمتن ۾ واڌ واپس وٺي مهانگائي تي ضابطو آندو وڃي، ٻي صورت ۾ احتجاج جو دائرو وڌيڪ وڌائڻ جي ڌمڪي ڏني وئي.
