ڪراچي ( ويب ڊيسڪ ) جيڪڏهن توهان هاءِ بلڊ پريشر جهڙي ”خاموش قاتل“ بيماري کان پاڻ کي محفوظ رکڻ چاهيو ٿا ته دالن ۽ ٻجن جو وڌيڪ استعمال پنهنجي عادت بڻايو۔
اها ڳالهه هڪ نئين طبي تحقيق ۾ سامهون آئي آهي۔
طبي جرنل ”بي ايم جي نيوٽريشن، پريوينشن اينڊ هيلٿ“ ۾ شايع ٿيل تحقيق موجب ٻجن، دالن ۽ سويا جي استعمال سان هاءِ بلڊ پريشر ۾ مبتلا ٿيڻ جو خطرو گهٽجي ويندو آهي۔
تحقيق ۾ معلوم ٿيو ته جيڪي ماڻهو ٻج، دالون، چڻا ۽ سويا ملڪ استعمال ڪن ٿا، انهن ۾ هاءِ بلڊ پريشر جو خطرو 30 سيڪڙو تائين گهٽجي ويندو آهي۔
هن تحقيق ۾ ماضي جي 12 تحقيقي رپورٽن ۽ 10 تحقيقي مقالن جي ڊيٽا جو تجزيو ڪيو ويو۔
مختلف ملڪن ۾ ٿيل هن تحقيقي ڪم ۾ مجموعي طور 88 هزار کان وڌيڪ ماڻهن کي شامل ڪيو ويو، جن مان ڪيترائي هاءِ بلڊ پريشر جا مريض هئا۔
ڊيٽا جي تجزيي کان پوءِ محققن ٻجن ۽ دالن جي استعمال ۽ هاءِ بلڊ پريشر جي خطري ۾ گهٽتائي جي وچ ۾ لاڳاپو دريافت ڪيو۔
تحقيق موجب جيڪي ماڻهو ٻجن ۽ دالن جو وڌيڪ استعمال ڪن ٿا، انهن ۾ هاءِ بلڊ پريشر جو خطرو 16 سيڪڙو تائين گهٽ هوندو آهي، جڏهن ته سويا جي استعمال سان اهو خطرو 19 سيڪڙو تائين گهٽجي ويندو آهي۔
هي اثر انهن ماڻهن ۾ وڌيڪ نمايان هوندو آهي، جيڪي روزانو 17 گرام ٻج يا دالون استعمال ڪن ٿا۔ انهن ۾ هن “خاموش قاتل” بيماري جو خطرو 30 سيڪڙو تائين گهٽجي ويندو آهي۔
محققن ٻڌايو ته 100 گرام ٻج يا سويا جي مقدار 5 يا 6 کاڌي جي چمچن جي برابر مٽر، دال، چڻن يا سويا بين جي برابر هوندي آهي۔
انهن وڌيڪ چيو ته ثبوتن مان نتيجن جي تصديق ٿئي ٿي، ڇاڪاڻتہ انهن غذائن ۾ پوٽاشيم، ميگنيشيم ۽ غذائي فائبر جي مقدار تمام گهڻي هوندي آهي، ۽ اهي سڀ شيون بلڊ پريشر کي صحتمند سطح تي رکڻ ۾ مدد ڏين ٿيون۔
محققن اهو به تسليم ڪيو ته تحقيق جا نتيجا ڪجهه حد تائين محدود آهن، پر نتيجن مان واضح ٿئي ٿو ته اهي غذائون هاءِ بلڊ پريشر جهڙي بيماري کان بچاءَ ۾ مددگار ثابت ٿي سگهن ٿيون۔
واضح رهي ته هاءِ بلڊ پريشر جو هڪ خطرناڪ پهلو اهو آهي ته گهڻن ماڻهن کي خبر ئي ناهي هوندي ته اهي هن بيماري جو شڪار ٿي چڪا آهن۔
حقيقت ۾ هاءِ بلڊ پريشر وارن لڳ ڀڳ ٽئين حصي جي ماڻهن کي معلوم ئي نه هوندو آهي ته اهي هن بيماري ۾ مبتلا آهن۔
