خيرپور ناٿن شاهه (رپورٽر) ڳوٺ شاهه محمد ڪلوئي ۾ جهيڙي دوران قتل ٿيل 24 ورهين جي جعفر علي ڪلوئي جو ڪيس داخل نه ٿيڻ خلاف وارثن ۽ ڳوٺاڻن لاش انڊس هاءِ وي تي رکي ڌرڻو هنيو.
مظاهرين الزام هنيو ته مال جي ڀيل تان علي بخش، سومر، رضا محمد ۽ عبدالله ڪلوئي مبينا طور ڪهاڙين ۽ ڏنڊن سان حملو ڪيو، جنهن ۾ جعفر علي مارجي ويو. وارثن جو چوڻ آهي ته ٻورڙي پوليس اڃا تائين ڪيس داخل ڪري جوابدار گرفتار ناهن ڪيا.
ڌرڻي سبب انڊس هاءِ وي تي ٽريفڪ معطل ٿي وئي ۽ گاڏين جون قطارون لڳي ويون. وارثن فوري ڪيس داخل ڪري جوابدارن جي گرفتاري ۽ زخمين کي بهتر علاج فراهم ڪرڻ جو مطالبو ڪيو.
