ڪراچي: (ويب ڊيسڪ) آثارِ قديمه ۽ ثقافتي ورثي جي ماهرن موهن جي دڙي ۾ نئين آثارِ قديمه جي تحقيق شروع ڪرڻ ۽ قديم شهر جي حفاظتي ڀت جي نقل تعمير ڪرڻ جو مطالبو ڪيو آهي، ته جيئن ماڻهن کي هن تاريخي ماڳ بابت بهتر ڄاڻ ملي، ثقافتي سياحت کي هٿي ملي ۽ قديم ورثي بابت شعور وڌي.
اهي سفارشون نيشنل ميوزيم ڪراچي ۾ ٿيل تقريب دوران پيش ڪيون ويون، جتي ڊاڪٽر اسما ابراهيم، ڊاڪٽر ڪليم الله لاشاري ۽ آمريڪا جي وسڪانسن يونيورسٽي سان لاڳاپيل سينيئر ماهر ڊاڪٽر جوناٿن مارڪ ڪينوئر موهن جي دڙي جي 2025-26ع جي تحقيقي مهم جا نتيجا پيش ڪيا.
ماهرن چيو ته قديم شهر جي ڀت جي نقل تعمير ڪرڻ سان سياحن ۽ عام ماڻهن کي موهن جي دڙي جي تاريخ سمجهڻ ۾ آساني ٿيندي ۽ سياحت کي به هٿي ملندي.
ان موقعي تي سنڌ جي ثقافت، سياحت، نوادرات ۽ آثارِ قديمه کاتي جي اسسٽنٽ ڊائريڪٽر علي لاشاري ٻڌايو ته 2026ع کان 2030ع تائين موهن جي دڙي جي ميوزيم ۽ آثارِ قديمه واري ماڳ لاءِ پنجن سالن جو ترقياتي منصوبو تيار ڪيو ويو آهي، جنهن ۾ تحقيق، تاريخي ورثي جي حفاظت، ميوزيم جي جديد بحالي، ڊجيٽل دستاويزڪاري ۽ پائيدار ثقافتي ترقي تي خاص ڌيان ڏنو ويندو.
