واشنگٽن/تهران/تل ابيب (ويب ڊيسڪ) ايران ۽ اسرائيل وچ ۾ جاري جنگ ۾ گذريل رات وڏي شدت آئي آهي، جتي ٻنهي ملڪن هڪ ٻئي تي سڌوسنئون بيلسٽڪ ميزائلن ۽ فضائي حملن جي برسات ڪري ڏني آهي.
هن خطرناڪ صورتحال تي آمريڪي صدر ڊونلڊ ٽرمپ کي هنگامي بريفنگ ڏني وئي، جنهن بعد هن جو بيان به سامهون آيو آهي، جڏهن ته ايراني پرڏيهي وزير عباس عراقچي صورتحال کي سنڀالڻ لاءِ پاڪستان، برطانيا ۽ فرانس سميت اهم ملڪن سان ٽيليفونڪ رابطا ڪيا آهن.
گذريل رات ايران جي اسلامي انقلابي گارڊ ڪور اسرائيل جي اترين علائقن ڏانهن بيلسٽڪ ميزائلن جا ڪيترائي وار ڪيا.
ايران چيو آهي ته هي حملا لبنان جي گاديءَ واري هنڌ بيروت ۾ اسرائيلي بمباريءَ جو جواب هئا ۽ هي هڪ هفتي تائين جاري رهندڙ حملن جي شروعات آهي.
ٻئي طرف، اسرائيلي فوج به فوري طور ڪارروائي ڪندي ايران جي اولهه ۽ وچ ۾ فوجي مرڪزن کي نشانو بڻائيندي جوابي حملا شروع ڪري ڏنا آهن.
آمريڪي صدر ڊونلڊ ٽرمپ کي واشنگٽن ۾ ايران پاران اسرائيل تي ڪيل ميزائل حملن بابت فوري طور تي تفصيلي بريفنگ ڏني وئي.
رپورٽن مطابق، ٽرمپ پردي پٺيان اسرائيلي وزيراعظم نيتن ياهو سان ٽيليفون تي رابطو ڪري کيس وڌيڪ جوابي ڪارروائي کان روڪڻ جي ڪوشش ڪئي ته جيئن خطي ۾ امن قائم رهي سگهي.
صدر ٽرمپ ميڊيا سان ڳالهائيندي ايران کي سخت لفظن ۾ چيو ته هاڻي بس گهڻو ٿي ويو، پر ان سان گڏ هو ايران سان جنگ ختم ڪرڻ لاءِ ڪنهن معاهدي تي پهچڻ جي به اميد رکي ٿو.
هن وڌندڙ ڇڪتاڻ کانپوءِ ايراني پرڏيهي وزير عباس عراقچي سفارتي محاذ تي وڏي سرگرمي جو مظاهرو ڪيو آهي.
هن پاڪستان، برطانيا، فرانس، ۽ ڪجهه اهم عرب ملڪن جي پرڏيهي وزيرن سان فوري ٽيليفونڪ رابطا ڪيا.
انهن رابطن دوران عراقچي واضح ڪيو ته ايران جو هي حملو اسرائيلي جارحيت جو دفاعي جواب هو. ايران خطي ۾ وڌيڪ جنگ نٿو چاهي، پر پنهنجي دفاع تان هٿ به نه کڻندو. هن عالمي طاقتن تي زور ڀريو ته اهي اسرائيل کي خطي کي تباهي طرف ڌڪڻ کان روڪين.
هن وقت سڄي دنيا جون نظرون وچ اوڀر جي صورتحال تي آهن. جيتوڻيڪ اسرائيل جي دفاعي نظام اڪثر ايراني ميزائلن کي هوا ۾ ئي تباهه ڪري ڇڏيو آهي ۽ نقصان گهٽ ٿيو آهي، پر ايران ۽ اسرائيل جي سڌوسنئون جوابي حملن سبب خطي ۾ وڏي پيماني تي جنگ جي پکڙجڻ جو خطرو پيدا ٿي ويو آهي.
پاڪستان پاران به ٻنهي ملڪن جي وچ ۾ امن امان بحال ڪرڻ لاءِ ٽياڪڙي وارو ڪردار ادا ڪرڻ جون ڪوششون جاري آهن.
Leave a Comment Leave a Comment
