دادو (اي بي خشڪ): ام رباب چانڊيو جي ٽن گهر ڀاتين جي قتل ڪيس جي شاهد رياض چانڊيو جي قتل واري ڪيس ۾ اهم اڳڀرائي ٿي آهي. ميهڙ پوليس ڪارروائي ڪندي ڪيس ۾ نامزد 4 جوابدار محمد صفر چانڊيو، احمد رضا پريل، ذوالفقار چانڊيو ۽ هڪ ٻئي جوابدار کي گرفتار ڪري ورتو آهي.
گذريل ڏينهن رياض چانڊيو جي قتل جو ڪيس فريد آباد ٿاڻي تي داخل ڪيو ويو، جنهن ۾ 10 سڃاتل ۽ 2 اڻڄاتل جوابدارن کي نامزد ڪيو ويو آهي.
پوليس موجب مرڪزي جوابدار غلام مرتضيٰ چانڊيو، عبدالستار، علي جان، علي دوست، عبدالرحيم ۽ سڪندر اڃا تائين گرفتار نه ٿي سگهيا آهن.
فريادي احسان چانڊيو ايف آءِ آر ۾ موقف اختيار ڪيو آهي ته رياض چانڊيو کي ٽيڻي قتل ڪيس ۾ شاهد بڻجڻ سبب قتل ڪيو ويو.
ياد رهي ته ام رباب چانڊيو جي والد، ڏاڏي ۽ چاچي جي ٽيڻي قتل ڪيس ۾ پاڪستان پيپلزپارٽي جي ٻن ايم پي ايز سميت 8 جوابدار اڳ ئي عدالت مان بري ٿي چڪا آهن، جڏهن ته ام رباب چانڊيو ان فيصلي خلاف سنڌ هاءِ ڪورٽ ڪراچي ۾ اپيل داخل ڪري رکي آهي.
هوڏانهن ام رباب چانڊيو رياض چانڊيو جي قتل واري واقعي جو چيف آف آرمي اسٽاف کان نوٽيس وٺڻ جو مطالبو ڪيو آهي.
