حيدرآباد (ذاڪر لغاري) ليڊي هيلٿ ورڪرز پروگرام کي پي پي ايڇ آءِ حوالي ڪرڻ جي امڪاني فيصلي خلاف آل سنڌ ليڊي هيلٿ ورڪرز اينڊ ايمپلائيز يونين جي سڏ تي حيدرآباد ۾ احتجاجي ريلي ڪڍي وئي ۽ پريس ڪلب اڳيان ڌرڻو هنيو ويو.
مرڪزي صدر حليمان لغاري جي اڳواڻي ۾ نڪتل احتجاجي ريلي ۾ وڏي انگ ۾ ليڊي هيلٿ ورڪرز شرڪت ڪئي ۽ پنهنجي مطالبن جي حق ۾ زوردار نعريبازي ڪئي.
ان موقعي تي اڳواڻن خطاب ڪندي چيو ته هو گذريل 24 سالن کان صحت کاتي ۾ خدمتون سرانجام ڏئي رهيون آهن، پر هاڻي سندن پروگرام کي خانگائڻ طرف ڌڪيو پيو وڃي.
هنن چيو ته پنهنجي حقن جي حاصلات لاءِ جيل ڪاٽي چڪا آهيون ۽ تشدد به برداشت ڪيو آهي، پر هاڻي سندن پروگرام کي پي پي ايڇ آءِ حوالي ڪرڻ جي صورت ۾ ساڻن ظلم ڪيو پيو وڃي.
اڳواڻن الزام هنيو ته پي پي ايڇ آءِ هڪ ناڪام ادارو آهي ۽ ليڊي هيلٿ ورڪرز پروگرام کي ان ۾ ضم ڪرڻ جي سازش ڪئي پئي وڃي.
هنن چيو ته شهيد بينظير ڀٽو طرفان شروع ڪيل ليڊي هيلٿ ورڪرز پروگرام کي پي پي ايڇ آءِ ۾ ضم ڪرڻ ڪنهن به صورت ۾ قبول نه ڪيو ويندو.
احتجاج ڪندڙن حڪومت کان مطالبو ڪيو ته پروگرام کي پي پي ايڇ آءِ حوالي ڪرڻ جو امڪاني فيصلو فوري طور واپس ورتو وڃي، ٻي صورت ۾ احتجاج جو دائرو وڌايو ويندو.
