ڪراچي (ويب ڊيسڪ ) سنڌ هيلٿ ڪيئر ڪميشن سنڌ جي سمورن سرڪاري ۽ خانگي اسپتالن ۾ فائر سيفٽي جو هنگامي آڊٽ ڪرائڻ جو حڪم ڏئي ڇڏيو آهي. ڪميشن اسپتال انتظاميا کي فوري طور فائر سيفٽي انتظامن جي جانچ ۽ عملي مشقون ڪرائڻ جي هدايت ڪئي آهي.
ڪميشن موجب اسپتال انتظاميا فائر سيفٽي آڊٽ دوران سامهون ايندڙ خامين ۽ انهن جي درستگي لاءِ کنيل قدمن بابت تفصيلي رپورٽ جمع ڪرائيندي. سول ڊفينس، فائر بريگيڊ ۽ لاڳاپيل ادارن کان حاصل ڪيل فائر سيفٽي منظوريُن جو پڻ ٻيهر جائزو وٺڻ جي هدايت ڪئي وئي آهي.
اسپتالن ۾ فائر الارم سسٽم، فائر ايڪسٽنگوشرز ۽ ايمرجنسي رستن جي موجودگي يقيني بڻائڻ سان گڏ ايمرجنسي رستن کي هر وقت رڪاوٽن کان پاڪ رکڻ جو حڪم ڏنو ويو آهي.
اسٽاف کي فائر سيفٽي ۽ هنگامي صورتحال کي منهن ڏيڻ بابت تربيت ڏيڻ ۽ باقاعده فائر ڊرلز ڪرائڻ جي پڻ هدايت ڪئي وئي آهي. ان کان علاوه آتش گير ۽ خطرناڪ مواد جي محفوظ اسٽوريج ۽ واضح نشاندهي يقيني بڻائڻ لاءِ چيو ويو آهي.
سنڌ هيلٿ ڪيئر ڪميشن جو چوڻ آهي ته ضرورت پوڻ تي اسپتالن جو بنا اڳواٽ اطلاع جي معائنو پڻ ڪري سگهجي ٿو.
