ڪراچي (ويب ڊيسڪ) ڊفينس فيز 8 ۾ نوجوان علي جعفري تي تشدد واري ڪيس ۾ مک جوابدار ملڪ ابراهيم کي گرفتار ڪيو ويو آهي، جڏهن ته واقعي جو ڪيس ساحل ٿاڻي تي داخل ڪيو ويو آهي.
وائرل وڊيو ۾ 3 نوجوانن کي علي جعفري تي تشدد ڪندي ڏسي سگهجي ٿو. متاثر نوجوان موجب هو دوستن سان ڊفينس فيز 6 ۾ ماني کائڻ ويو هو، ٻاهر نڪرڻ بعد ڪنهن سندس مٿي تي ڏنڊو هنيو، جنهن سبب هو بيهوش ٿي ويو.
علي جعفري جو چوڻ آهي ته جوابدار کيس ڪار ۾ کڻي ويا، تشدد ڪيو ۽ هڪ ڄڻو پستول تاڻي بيٺو رهيو. جوابدار مٿس معافي وٺڻ لاءِ به زور ڀريندا رهيا.
متاثر نوجوان دعويٰ ڪئي ته جوابدارن پئسا گهريا ۽ سندس اڪائونٽ مان خريداري پڻ ڪئي.
پوليس موجب نوجوان جو گزري ٿاڻي جي حد ۾ گيمنگ زون اندر جهيڙو ٿيو هو، جڏهن ته تشدد جو واقعو 29 آگسٽ تي پيش آيو.
