گمبٽ (ويب ڊيسڪ) گمبٽ ڀرسان راڻيپور ۽ سيٺارجا وچ ۾ ريلوي ٽريڪ تي بم جي اطلاع بعد مسافر ٽرينن کي مختلف ريلوي اسٽيشنن تي روڪيو ويو.
سيڪيورٽي ذريعن موجب اطلاع ملڻ کانپوءِ پوليس، بم ڊسپوزل اسڪواڊ، ريلوي پوليس ۽ ٻين سيڪيورٽي ادارن گڏيل سرچ آپريشن شروع ڪيو، جيڪو چار ڪلاڪ جاري رهيو.
سرچ آپريشن دوران ڪراچي کان پنجاب ۽ پنجاب کان ڪراچي ويندڙ ڪيترين ئي مسافر ٽرينن کي مختلف اسٽيشنن تي روڪيو ويو. روڪيل ٽرينن ۾ قراقرم ايڪسپريس، علامه اقبال ايڪسپريس، ملت ايڪسپريس ۽ ڪراچي ايڪسپريس سميت ٻيون ٽرينون شامل هيون.
ڊائون ٽريڪ تي بزنس ايڪسپريس، فريد ايڪسپريس ۽ ملت ايڪسپريس سميت ٻيون ٽرينون به روڪيون ويون.
بم ڊسپوزل اسڪواڊ، پوليس ۽ ٻين ادارن جي سرچ آپريشن کانپوءِ ريلوي ٽريڪ کي ڪليئر قرار ڏنو ويو.
چار ڪلاڪن کانپوءِ روڪيل سمورين مسافر ٽرينن کي پنهنجي منزل ڏانهن روانو ڪيو ويو.
