ايران سان تازين جهڙپن باوجود جنگ بندي اڃا برقرار آهي: ڊونلڊ ٽرمپ

واشنگٽن (ويب ڊيسڪ) آمريڪي صدر ڊونلڊ ٽرمپ ايران سان تازي ڇڪتاڻ باوجود دعويٰ ڪئي آهي ته ٻنهي ملڪن وچ ۾ جنگ بندي اڃا تائين برقرار آهي.
وائيٽ هائوس مان جاري ڪيل بيان ۾ آمريڪي صدر چيو ته ايران پاران ڪيل حملن جي جواب ۾ آمريڪي فوج دفاعي ڪارروايون ڪندي ايراني فوجي ٺڪاڻن کي نشانو بڻايو آهي.
هن دعويٰ ڪئي ته آمريڪي حملا انتهائي ڪامياب رهيا، جنهن ۾ ايران جي ميزائل مرڪزن، ڪمانڊ سينٽرز ۽ ٻئي عسڪري انفراسٽرڪچر کي وڏو نقصان پهچايو ويو آهي.
ڊونلڊ ٽرمپ ايران کي خبردار ڪندي چيو ته جيڪڏهن تهران جلد امن معاهدي تي صحيحون ڪري ڇڏي ته مستقبل ۾ وڌيڪ تشدد ۽ ويڙهه کان بچي سگهجي ٿو.
سندس چوڻ هو ته آمريڪا خطي ۾ امن ۽ استحڪام جو خواهشمند آهي، پر آمريڪي فوج ۽ مفادن تي ڪو به حملو ڪنهن به صورت ۾ برداشت نه ڪيو ويندو.
سياسي ماهرن موجب، ٽرمپ جو هي بيان ايران تي دٻاءُ وڌائڻ جي هڪ ڪوشش آهي ته جيئن کيس ڳالهين جي ميز تي آڻي سگهجي.