خيرپور (شڪيل جانوري) خيرپور ڀرسان ڳوٺ متو بڙدي ۾ گهٽي جي لنگهه واري تڪرار تان ٻن ڀائرن ۾ جهيڙو ٿي پيو، جنهن ۾ 4 عورتن سميت 8 ڄڻا زخمي ٿي پيا.
جهيڙي دوران ڏنڊن ۽ سروٽن جا وار لڳڻ سبب نازيا خاتون، دادن خاتون، مجاهد خاتون، ساجن بڙدي، سڄڻ، محمد نواز، جميل بڙدي سميت 8 ڄڻا زخمي ٿي پيا، جن کي علاج لاءِ سول اسپتال خيرپور منتقل ڪيو ويو.
وڏي ڀاءُ ساجن بڙدي الزام هنيو ته سندس ننڍي ڀاءُ جميل بڙدي ۽ ٻين ماڻهن گهٽي جي لنگهه واري معاملي تان سندن گهر تي حملو ڪري امڙ ۽ ٻين گهرڀاتين کي زخمي ڪيو.
ساجن بڙدي جو وڌيڪ چوڻ هو ته بااثر ماڻهن سندن ڀائرن ۾ اختلاف پيدا ڪري کين ويڙهايو آهي.
هن اختيارين کان مطالبو ڪيو ته واقعي جي جاچ ڪري ذميوارن خلاف قانون موجب ڪارروائي ڪري کين انصاف فراهم ڪيو وڃي.
